Patreon 傳送門：銀行閑閑談 #67 — 說一下渣打 Smart Card 的 3 個搞笑位
DBS Live Fresh 信用卡 2 大 Card Feature
DBS Live Fresh 信用卡有 2 大 Card Feature，第一點就係玩番 DBS 自己玩咗好耐既 Flexi Payment，包括旅遊及海外簽賬交易同埋網購特長90 日還款期 (而家有個 fancy term 叫 Buy Now Pay Later，其實用信卡唔係一向都係 Buy Now Pay Later 既咩？)，同埋無獨有偶、今期渣打都大做既免息分期，不過當渣打玩緊無上限 3 個月分期，DBS 就玩緊頭半年 10 次 6 個月分期喇。
至於第 2 個 Card Feature就係玩自選 5% 現金回贈類別，總共有 7 大類：網上外幣簽賬、網上旅遊商戶簽賬、網上超市簽賬、網上餐飲簽賬、網上娛樂簽賬、網上服飾簽賬、網上慈善捐獻。
即係話清一色係「網上簽賬」，至於每個 category 有咩實際商戶，由於我無收錢啦，所以就麻煩自己查清楚 T&C 喇。
似曾相識的「自選回贈」
其實今日唔係想幫 DBS 賣廣告，係想問吓大家有無覺得呢種「自選回贈」既玩法有啲似曾相識，係喇係喇，匯豐就玩咗好多年既「最紅自主獎賞」就係呢種玩法，原來不經不覺已經玩咗 10 年，最近仲出咗 10 倍獎賞，即係最高可以用 Visa Signature Card 食飯做到 14倍 = 5.6% 回贈，都幾勁架。
不過今日都唔係想講匯豐，因為以華田既認知呢，匯豐原來都唔係最早喺香港玩呢種「自選回贈」既第一人。「最紅自主獎賞」喺 2011 年面世，但係香港有一間銀行喺 2009 年就已經玩緊，係邊間呢？唔知大家有無用過呢張卡，我以前就有一張喇！
呢張卡係大新銀行既「我至愛商戶」信用卡，可以話係大新少有非公仔、非聯營既自家信用卡，都真係可以話係歷史悠久架，右上角仲有已經無咗好多年既「豐明銀行」logo 添。
可能大家會話：我唔覺眼大新有得申請喎，係吖，因為喺 2013 年已經收咗檔無再出，之後再 force convert 埋 existing cardholders，張卡就從此消失了。
咁叫得「我至愛商戶」，大家就估到入面有一啲「自選」既元素喺入面，不過佢就唔似匯豐 DBS 咁揀「類別」，而係直接揀「商戶」。
玩法係大家先喺第一個月喺商戶 A 簽賬，第二個月開始商戶 A 就會出現喺大家 e-banking checklist 入面，大家就可以揀選商戶 A，咁之後商戶 A 既簽賬就有 10 倍回贈，即係 5% 喇。
咁 5% 都唔係好多啫！
大家首先要番番去 2009 年既時空，當大家而家慣晒 Red Card 網購 4%、Livi 網購 8%、周柏豪卡劃一 1.5% 回贈既時候，想提提大家 Red Card 係 2019 尾、Livi MasterCard 係 2021 年初、周柏豪卡係 2017 年中出世既產品，2009 年信用卡有 5% 回贈係好多架喇！
Medium 傳送門： 信用卡閑談(一) — 渣打1.5%回贈 — 香港信用卡進入「零利潤時代」
有意思的「自選回贈」
其實呢張卡真係幾有意思架，因為佢開創咗一種新法玩，優惠唔再係銀行主動同商戶合作傾番嚟(例如恒生同怡和、花旗同 hktvmall、銀行同各大小餐廳等等)，客戶可以自由選擇可能同銀行根本無關係既商戶。
大家可以諗吓，當大家喺匯豐揀「賞滋味」既時候﹐唔通匯豐又同全香港所有餐廳都有合作咩，唔會喇！
至於點解呢張卡玩咗 4 年幾就無玩呢？我諗又放番去 2013 年既時空啦，當 2017 年渣打率先玩 1.5% 回贈已經係接近割喉之際，2013 年玩長期 5% 回贈的確好難頂。當然玩法複雜都係死症，玩法愈複雜，能夠玩既人就愈精靈，咁銀行博佢哋用盡咗回贈後仍然繼續碌，甚至唔記得還錢要罰息既機會就更低，咁銀行就更難賺錢啦。
小銀行嚟到 2021 年只會愈來愈難做，Too Big to Fail 早已變成 Too Small to Succeed 啦。
Patreon 傳送門：銀行閑閑談 #77–從 Too Small To Succeed 看銀行業前景
—
記住留意條款及細則，以上內容唔構成投資/投機/投訴/投產/投胎既建議，證券價格可升可跌。仲有仲有，借定唔借，還得到先好借哦！
2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！
關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。